Hezkuntza finantzario kritikoa, noizko? Lagun iezaguzu Eusko Legebiltzarrera iristen

Noizko hezkuntza ekonomiko bat finantza-sistemak gizartean eta planetan dituen inpaktuak ulertzeko tresnak eta gaitasunak emango dizkiena ikasleei?

Estatu espainiarreko eta munduko hainbat erakunde eta sarek finantza etikoetan oinarritutako hezkuntza lantzen dugu, eta finantza- eta ekonomia-sistemari buruzko ikuspegi kritikoa partekatzen dugu, baita finantza alternatibo solidarioak sustatzeko jarrera konprometitu eta aktiboa ere. Sare horien artean dago, halaber, Finantzaz Haratago, 2019an sortutako Finantza Etikoetan eta Alternatibetan oinarritutako Hezkuntzaren Euskal Sarea. Sare eta erakundeok kezka bat partekatzen dugu ezarritako hezkuntza ekonomiko eta finantzarioaren ereduarekin, eta dauden alternatibak landu eta ikusarazteko beharra sentitzen dugu; horregatik, ezinbestekoa ikusten dugu politikariei gure jarrera adieraztea.

Bereziki, euskal testuinguruan, Finantzaz Haratagotik adierazi nahi dugu bereziki kezkatzen gaituztela eskola-curriculumean eta haren prestakuntza-materialetan sartutako finantza-hezkuntzako edukiek. Era berean, oso kezkagarria iruditzen zaigu finantza-erakundeak ikastetxeetan sartzea ahalbidetzen ari dela, CNMW eta Espainiako Bankua esaterako. Eta, azkenik, garrantzitsua da aipatzea Hezkuntzaren Lege berriak bigarren hezkuntzan ekonomia irakasgaiaren garrantzia murrizten duela, hautazkoa izatera pasatuz, eta batez ere batxilergoan, ekintzailetzarekin zuzenean nahastuz, ekonomia- eta finantza-sistemen azterketa azalekoa eta potentzial kritiko gutxikoa izatearen ondorioarekin.

Bigarren Hezkuntzako Ekonomia Irakasleen Elkarteen Estatuko Konfederazioak (CEAPES) adierazi duenez, oinarrizko eduki garrantzitsuei garrantzi marjinala emateak, hala nola merkatu mota desberdinen funtzionamendua ulertzeari, edo makroekonomiari edo lan-merkatuaren edo finantza-sistemaren funtzionamenduari buruzko oinarrizko nozioei, eragozten du ikasleak egungo gizartearen funtzionamendua azaltzen duten funtsezko mekanismoak ezagutzea.

Defendatzen dugun ekitatearen, justizia sozialaren eta giza eskubideen ikuspegitik, uste dugu gehiengoaren finantza-eredu konbentzionala eta hura osatzen duten erakundeak jarrera kritikoz aztertu behar direla, kontuan hartuta zenbateraino laguntzen duten ekonomia inklusibo, zuzen eta justua lortzen. Finantza-hezkuntza hezkuntza-proiektuaren parte denez, funtsezkoa da azpimarratzea finantza-sistemaren eta banku-operatibaren giza, gizarte eta ingurumen inpaktuei buruzko edukiak sartu behar direla, banakako eta taldeko erantzukizunak esleitzeko gizarte bidezkoago eta solidarioago baten eraikuntzan.

Eskaera honekin Eusko Legebiltzarreko ordezkari politikoengana jotzen dugu. Hezkuntza-sistemak gaitasunak, espiritu kritikoa eta heldutasuna eman behar dizkie ikasleei, inguruan moldatzen jakiteko. Ekonomia, pertsonen eta ingurunearen premiei lotutako gizarte-zientzia den aldetik, ikuspegi holistiko eta kritiko batetik ulertu behar da. Eduki eta eztabaida berriak behar ditugu ikasgeletan, gazteek ekonomia- eta gizarte-egitura bidezkoagoak eraikitzeko duten konpromisoa areagotzeko, desberdintasunaren aurka borrokatzeko, ingurumena babesteko, emakumeak ahalduntzeko, gobernantza demokratikorako eta giza eskubideak baliatzeko.

Dei egiten dugu printzipio etiko horiek integratuko dituen hezkuntza ekonomikoa susta dadin. SINATU HEMEN GURE PROPOSAMENA EUSKO LEGEBILTZARRERA IRITSI DADIN.

Zabalik dago RedEFESen IV. Jardunaldietan izena emateko epea

IZEN-EMATEA ZABALIK! A zer gogoak genituen iragartzeko! Ekonomia, ekintzailetza edota finantza hezkuntza kritikoa lantzen baduzu, ala ekonomia edota finantzetako irakaslea bazara, eman izena RedEFESen IV. Jardunaldietan (Urriaren 20a baino lehen!).

Gogoratu hezkuntza-esperientzia bat aurkeztera ere etor zaitezkela, bete galdetegia irailaren 29a baino lehen. Informazio guztia, behin-behineko egitaraua eta izena emateko orria hemen dituzu: https://redefes.org/eu/jardunaldiak-2023/

Azaroaren 10 eta 11an ikusiko dugu elkar Bilbon. Urrutitik bazatoz, erne, zu ekartzeko aurrekontua dugu eta!

Zalantzarik baduzu, idatziguzu: info@finantzazharatago.org

Hezkuntza ekonomiko, finantzario eta ekintzaile kritikoan egiten duzun lana ezagutu nahi dugu

Dakizunez, azaroaren 10 eta 11n RedEFESen IV.  Jardunaldiak antolatuko ditugu, hezkuntza-sisteman Ekonomia eta Ekintzailetza irakasteko testuingurua aztertzeko eta hezkuntza ekonomiko, finantzario eta ekintzaile kritiko baterako alternatibak partekatzeko.

Jardunaldi horien baitan, irakasleek ekonomiaren eta sistema finantzarioaren inguruan kontzientzia kritikoa sustatzeko garatzen dituzten esperientziak ezagutzeko espazioak izango ditugu. Zure ikasleekin ekonomia alternatiboak, finantza etikoak edo ekintzailetza solidarioa landu badituzu, horren berri jakin nahi dugu.

Bete galdetegi hau irailaren 29a baino lehen eta aurkeztu zure esperientzia jardunaldietan*: https://labur.eus/experienciasredefes

*(Aurrekontua dugu zu Bilbora ekartzeko!)

Finantza etikoen hezkuntza-esperientziak jasotzeko epea luzatu dugu

Finantza etiko eta solidarioetako hezkuntza-esperientzien bila ari gara. Baduzu bat? Hala bada, zatoz Bigarren Hezkuntzako, Batxilergoko, Heziketa Zikloetako eta Unibertsitateko irakasleentzako Ekonomia eta Finantza Hezkuntza Kritikoari buruzko IV. RedEFES Jardunaldietara aurkeztera.

Finantzaz Haratagok, Finantza Etiko eta Alternatiboetako Hezkuntzaren Euskal Sareak, RedEFES sarearen Estatuko IV. Jardunaldiak antolatuko ditu, hezkuntza-sisteman Ekonomia eta Ekintzailetza irakasteko testuingurua aztertzeko eta hezkuntza ekonomiko, finantzario eta ekintzaile kritiko baterako alternatibak partekatzeko.

Finantza etiko eta solidarioak landu badituzu ikasgelan, kontaiguzu galdetegi honetan eta aurkez ezazu jardunaldietan: finantza-sistemaren eraginei buruz gazteen kontzientzia kritikoa bultzatzen duten esperientziak, metodologia parte-hartzaileen bidez eztabaida eta hausnarketa aktiboa sustatzen dutenak, eta ekonomia-hezkuntza kritiko eta askotarikoaren alde egiten dutenak, finantza etiko eta solidarioak alternatiba gisa ezagutzera ematen dituztenak.

IRAILAREN 29RA ARTE LUZATU DUGU ESPERIENTZIAK BIDALTZEKO EPEA.

Bestalde, zure esperientzia Arcadi Oliveres sarietara aurkeztera animatzen zaitugu. Irabaziz gero, zure ekimena garatzen lagunduko dizugu.

Ikusi RedEFESen IV. Jardunaldien informazio guztia hemen.

Hona hemen gure ESScape jolasa!

(…) Ongi etorri, detektibeak! Laster hasiko da “Finantzaz Haratago Sariak” lehiaketa. Sareko epaimahaiak aukeratu zaituzte, hain preziatua den sari hau nork merezi duen erabaki dezazuen.

Saria jasotzeko hautagai diren 4 pertsonek erabilitako finantza-zerbitzuak eta zer motatako proiektuak finantzatu dituzten aztertu beharko duzue. Horrekin guztiarekin, sariaren irabazlea nor den hautatu beharko duzue (…)

Horrela, gamifikazio-jolasari ematen diogu hasiera. Proposamen honen helburua jokoetan oinarritutako ikaskuntza da. Hainbat asmakizun konponduz, parte-hartzaileek errealitate desberdinak ezagutuko dituzte, non finantza etikoen eta ekonomia solidarioaren inpaktu eraldatzailea deskubrituko duten.

Jokoa 5 kutxa eramangarritan diseinatu egin da. Horrela, askoz errazagoa da ikastetxeetara eta bestelako gunetara iristea.


Jokoaren oinarrizko informazioa:

– Adina: 15 urtetik aurrera

– Jokoaren iraupena: 50 minutu

– Jokalari kopurua: 3-5 pertsona kutxa bakoitzeko


Zure institutuko ikasleekin jolastu nahi duzu? Idatziguzu helbide honetara: info@finantzazharatago.org

RedEFES sarearen IV jardunaldiak: Azaroak 10 eta 11 Bilbon

Finantzaz Haratagok, Finantza Etiko eta Alternatiboetako Hezkuntzaren Euskal Sareak, RedEFES sarearen Estatuko IV. Jardunaldiak antolatuko ditu azaroaren 10 eta 11n Bilbon, hezkuntza-sisteman Ekonomia eta Ekintzailetza irakasteko testuingurua aztertzeko eta hezkuntza ekonomiko, finantzario eta ekintzaile kritiko baterako alternatibak partekatzeko.

Irakasleak eta hezkuntza ekonomiko eraldatzailea bultzatu nahi duten pertsona eta erakundeak gonbidatzen ditugu ikasleen kontzientzia kritikoa sustatzen duten eta ekonomiaren, finantzen eta enpresaren inguruko eztabaida eta hausnarketa aktiboa sustatzen duten esperientzietan parte hartzera eta/edo aurkeztera.

*Bilbotik kanpoko parte-hartzaileak bertaratzeko aurrekontua daukagu.*

Laster partekatuko dugu izen-emateko esteka eta programa osoa!  Hemen duzu jardunaldien webgune ofiziala.


HELBURUAK:

    • 23/24 ikasturterako lankidetza-proposamenak aurkeztea.
    • Eskura dauden baliabide didaktikoei eta horiek indarrean dagoen hezkuntza-curriculumean nola txertatu erakusten duten tailerrak antolatzea.
    • Ikasgeletan praktikan jartzen ari diren esperientzia eta tresna pedagogikoen karrusela aurkeztea.
    • Hezkuntza formalean, informalean eta ez-formalean finantza etikoak landu nahi duten irakasleen eta erakundeen arteko topagunea bultzatzea.

IREKI EGIN DUGU FINANTZA ETIKO ETA SOLIDARIOEN ARLOKO HEZKUNTZA-ESPERIENTZIAK AURKEZTEKO EPEA

Bidali zure proposamena galdetegi hau betetzen uztailaren 21a baino lehen. Irailaren 29ra arte luzatu dugu epea!

Honelako esperientziarik egin baduzu, kontaiguzu galdetegian eta aurkez ezazu jardunaldietan: finantza-sistemaren eraginei buruz gazteen kontzientzia kritikoa bultzatzen dutenak, metodologia parte-hartzaileen bidez eztabaida eta hausnarketa aktiboa sustatzen dutenak, eta ekonomia-hezkuntza kritiko eta askotarikoaren alde egiten dutenak, finantza etiko eta solidarioak alternatiba gisa ezagutzera ematen dituztenak.

Lurralde mailako erakundeentzako mailegu jasangarrien inguruko solasaldia antolatuko dugu ekainaren 12an

Ekainaren 12an “Lurralde mailako erakundeentzako mailegu jasangarriak” solasaldia antolatuko dugu, Ekonomia Sozial eta Solidarioaren Sareak Garatzeko Funtsarekin (FonRedess), Biziera Onaren Unibertsitatearekin eta Ekonomia Sozial Solidarioaren Curriculum Globalaren aldeko Kanpainarekin batera.

Ekitaldia online izango da 17: 00etan, eta gizarte-erakundeei, ekintzaileei, mikrokredituetako teknikariei, mikrofinantzetako adituei, lurraldeetako langileei eta abarri zuzenduta dago.

Hiru hizkuntzatan egingo da: Gaztelania / Portugesa / Ingelesa

Izen-ematea doakoa da eta hemen egin dezakezu: https://forms.gle/qwmzDgPHhqgJ8GYSA

Arcadi Oliveres sariaren modalitate berria: finantza etikoei buruzko proposamen pedagogiko onenak aitortzea

 

Fundación Finanzas Éticas eta RedEFESek bat egin dute Arcadi Oliveres sarian kategoria berri bat bultzatzeko. Sari horren bidez, hezkuntzaren eremuan finantza etikoen hedapena sustatu eta baloratu nahi da. Modalitate berriak bigarren hezkuntzako, batxilergoko eta Lanbide Heziketako proposamen pedagogiko onenak identifikatu eta saritu nahi ditu.

Kategoria berri honen helburua da irakasleengandik zuzenean sortzen diren proposamen pedagogikoak aitortzea, proposamena inplementatzeko ikastetxeren baten babesa dutenak eta finantza etikoak gizartea eraldatzeko tresna gisa bultzatzeko proposamen didaktikoak aurkezten dituztenak. Modalitate honekin, Arcadi Oliveres Sariak hezkuntza-tresna berriak sustatu nahi ditu, ikasleek finantzek errealitatea nola eta zergatik eralda dezaketen ezagutu eta esperimentatu ahal izan dezaten.

Sariari esker, ikasgelan proiektua inplementatzeko egon litezkeen gastuak (materialak edo bestelakoak) ordainduko dira, eta saritutako pertsonak edo pertsonek RedEFESen urteko jardunaldietan parte hartzea ere estaliko du. Jardunaldi horiek azaroaren 10 eta 11n egingo dira, Bilbon.

Proposamenak Fundación Finanzas Eticas fundazioaren webgunean dagoen inprimakiaren bidez aurkez daitezke (https://finanzaseticas.net/premio-arcadi-oliveres/premio-propuestas-secundaria-bachillerato-y-fp/), 2023ko irailaren 1era arte.

Kategoria honi buruzko informazio gehiago esteka honetan kontsulta daiteke. Era berean, Arcadi Oliveres Sariari buruzko informazio gehiago jaso daiteke esteka honetan.

 

 

[Laburpen bideoa] Hala izan zen Finantza Etiko eta Alternatiboen Nazioarteko II. Foroa

'COOKIES'-en politika onartu behar duzu eduki hau erakusteko.

2023ko apirilaren 24tik 26ra, Finantza Etiko eta Alternatiboen II. Foroa antolatu zuen Finantzaz Haratago sareak Bilbon, Donostian eta streaming bidez.
Ekitaldian finantza etiko eta alternatiboen rola aztertu genuen, ekimen komunitarioak bultzatzeko eta kredituak eskuratzeko.
Genero-desberdintasunari eta finantzei buruz egiten ari garen ikerketaren ondorio nagusiak, lege-testuingurua eta erabilitako metodologia aurkeztu genituen. ‘Finantzak eta genero-desberdinkeriak’ ikerketaren eguneratzea da eta laster argitaratuko dugu.
Era berean, Iparraldeko eta Hegoaldeko hainbat esperientzia ezagutu genituen, bai finantza etiko eta alternatiboko tresnak lantzen eta sustatzen dituzten erakundeenak, bai kredituak eta txandakako funts solidarioak jasotzen dituzten Ekonomia Sozial eta Solidarioaren ekimen, ekintzailetza eta proiektuenak.

Ara! Gorputzeko kideek Bizitza Onaren Egunerokoa aurkeztu zuten. Hamabi hilabetetan edo ziklotan antolatutako egunerokoa da, eta astero bete dezakezu, zure erritmoan, eta honako galdera hauei buruz hausnartu ahal izango duzu: Zenbat denbora ematen duzu enpleguetan? Eta zaintza-lanetan? Zer eragin du diruak zure bizitzan?  Ekonomia feminista eta Abya Yalako ‘Bizitza Ona’ printzipioa ardatz izanik, astez aste eta hilabetez hilabete hausnartu dezakezu.

Era berean, Ekonomia Sozial Solidarioaren Curriculum Globalaren aldeko Kanpainan eta Biziera Onaren Unibertsitatean egindako nazioarteko aurrerapenei buruz hitz egin genuen, bertako kideak gara eta.

Eskerrik asko entzutera eta zuen hausnarketak partekatzera etorri zineten guztiei. Hurrengo ekitaldietan ikusiko dugu elkar berriz ere!