Hezitzailea zara? Eraman zure ahotsa 2022ko Munduko Foro Sozialera

Ekonomia Sozial eta Solidarioaren Curriculum Global baten aldeko kanpainatik eta Biziera Onaren Unibertsitatetik, hezkuntzari buruzko herri-galdeketa bat kaleratu dugu 2022ko Munduko Foro Sozialera eramateko.

Hezitzailea bazara, irakaslea izan ala ez izan, galdeketan parte hartzeko gonbidapena luzatzen dizugu. Ahots guztiak aurten Mexikon antolatuko den Munduko Foro Sozialera eraman nahi ditugu, kolektibo, sare, espazio, federazio eta abarren errealitatera egokitutako eskaerak.

Galdeketaren emaitzak ES Magazine-n (Ekonomia Sozialaren Aldizkarian) sistematizatu eta argitaratuko ditugu, baita beste espazio kolektibo batzuetan ere.

PARTE HARTU HERRI-GALDEKETAN HEMEN.

“Hezkuntza finantzario kritikoa eta etikoa gizartea eraldatzeko” Unitate Didaktikoa eskuragarri dago dagoeneko

Unitate didaktiko hau Lehen Hezkuntzako 5.-6. mailatik Batxilergora arteko ikasleentzat egina dago, eta STEILAS eta Finantzaz Haratago eragileen elkarlanari esker sortu da.

Haren bidez, sistema ekonomikoaren inguruko ikuspegi kritiko bat eskaini nahi da, eta bizitza erdigunean jartzen duten beste antolaketa era batzuk aurkeztu nahi dira. Unitate didaktiko honetan, ikasleek eta irakasleek gaiak aztertzeko era ezberdin bat topatuko dute, ikuspegi kritiko eta eraldatzaile batetik, balioa
emateko pertsonen eta planetaren zerbitzura dagoen eta gutxi batzuen onura helburutzat ez duen ekonomia bat sustatzeak duen garrantziari.

Unitate didaktikoak ikasleari lagundu egingo dio beste errealitate batzuk pentsatzeko eta ezagutzeko bidean, bultzatu egingo du zalantzak eta jakin mina izatera, eta lagundu egingo dio justifikatzen, argudiatzen eta aztertzen, haren autonomia sustatuz eta errealitatea beste ikuspegi batetik erakutsiz. Azken finean, lan horrek pentsamendu kritikoa sustatuko du.

ESKURATU ARGITALPENA HEMEN.

Hezkuntza finantzario kritikoa, noizko? Lagun iezaguzu Eusko Legebiltzarrera iristen

Noizko hezkuntza ekonomiko bat finantza-sistemak gizartean eta planetan dituen inpaktuak ulertzeko tresnak eta gaitasunak emango dizkiena ikasleei?

Estatu espainiarreko eta munduko hainbat erakunde eta sarek finantza etikoetan oinarritutako hezkuntza lantzen dugu, eta finantza- eta ekonomia-sistemari buruzko ikuspegi kritikoa partekatzen dugu, baita finantza alternatibo solidarioak sustatzeko jarrera konprometitu eta aktiboa ere. Sare horien artean dago, halaber, Finantzaz Haratago, 2019an sortutako Finantza Etikoetan eta Alternatibetan oinarritutako Hezkuntzaren Euskal Sarea. Sare eta erakundeok kezka bat partekatzen dugu ezarritako hezkuntza ekonomiko eta finantzarioaren ereduarekin, eta dauden alternatibak landu eta ikusarazteko beharra sentitzen dugu; horregatik, ezinbestekoa ikusten dugu politikariei gure jarrera adieraztea.

Bereziki, euskal testuinguruan, Finantzaz Haratagotik adierazi nahi dugu bereziki kezkatzen gaituztela eskola-curriculumean eta haren prestakuntza-materialetan sartutako finantza-hezkuntzako edukiek. Era berean, oso kezkagarria iruditzen zaigu finantza-erakundeak ikastetxeetan sartzea ahalbidetzen ari dela, CNMW eta Espainiako Bankua esaterako. Eta, azkenik, garrantzitsua da aipatzea Hezkuntzaren Lege berriak bigarren hezkuntzan ekonomia irakasgaiaren garrantzia murrizten duela, hautazkoa izatera pasatuz, eta batez ere batxilergoan, ekintzailetzarekin zuzenean nahastuz, ekonomia- eta finantza-sistemen azterketa azalekoa eta potentzial kritiko gutxikoa izatearen ondorioarekin.

Bigarren Hezkuntzako Ekonomia Irakasleen Elkarteen Estatuko Konfederazioak (CEAPES) adierazi duenez, oinarrizko eduki garrantzitsuei garrantzi marjinala emateak, hala nola merkatu mota desberdinen funtzionamendua ulertzeari, edo makroekonomiari edo lan-merkatuaren edo finantza-sistemaren funtzionamenduari buruzko oinarrizko nozioei, eragozten du ikasleak egungo gizartearen funtzionamendua azaltzen duten funtsezko mekanismoak ezagutzea.

Defendatzen dugun ekitatearen, justizia sozialaren eta giza eskubideen ikuspegitik, uste dugu gehiengoaren finantza-eredu konbentzionala eta hura osatzen duten erakundeak jarrera kritikoz aztertu behar direla, kontuan hartuta zenbateraino laguntzen duten ekonomia inklusibo, zuzen eta justua lortzen. Finantza-hezkuntza hezkuntza-proiektuaren parte denez, funtsezkoa da azpimarratzea finantza-sistemaren eta banku-operatibaren giza, gizarte eta ingurumen inpaktuei buruzko edukiak sartu behar direla, banakako eta taldeko erantzukizunak esleitzeko gizarte bidezkoago eta solidarioago baten eraikuntzan.

Eskaera honekin Eusko Legebiltzarreko ordezkari politikoengana jotzen dugu. Hezkuntza-sistemak gaitasunak, espiritu kritikoa eta heldutasuna eman behar dizkie ikasleei, inguruan moldatzen jakiteko. Ekonomia, pertsonen eta ingurunearen premiei lotutako gizarte-zientzia den aldetik, ikuspegi holistiko eta kritiko batetik ulertu behar da. Eduki eta eztabaida berriak behar ditugu ikasgeletan, gazteek ekonomia- eta gizarte-egitura bidezkoagoak eraikitzeko duten konpromisoa areagotzeko, desberdintasunaren aurka borrokatzeko, ingurumena babesteko, emakumeak ahalduntzeko, gobernantza demokratikorako eta giza eskubideak baliatzeko.

Dei egiten dugu printzipio etiko horiek integratuko dituen hezkuntza ekonomikoa susta dadin. SINATU HEMEN GURE PROPOSAMENA EUSKO LEGEBILTZARRERA IRITSI DADIN.

“Hezkuntza finantzario kritikoa eta etikoa gizartea eraldatzeko” Unitate Didaktikoaren aurkezpena Bilbon

Datorren ostegunean, urtarrilak 20, Steilas sindikatuarekin batera sortutako “Hezkuntza finantzario kritikoa eta etikoa gizartea eraldatzeko” Unitate Didaktikoa aurkeztuko dugu.

Unitate Didaktikoa 10 eta 18 urte bitarteko ikasleei zuzenduta dago. Bertan egungo sistema ekonomikoaren (bereziki finantza-sistemaren) ikuspegi kritikoa lantzen dugu, eta bizitza erdigunean jartzen duten beste antolaketa-modu batzuk aurkezten ditugu. Argitalpenak proposatutako dinamiken bitartez, denbora-bankuak, trukea, moneta soziala edo banku armatuaren eta etxegabetzeen arazoak lantzeko aukera izango dute ikasleek, besteak beste.

Aurkezpena La Bolsan (Ibaiondoko Barrutiko udal bulegoa; Pilota kalea, 10) izango da, 2022ko urtarrilaren 20an, osteguna, 11:00etan. Bertan ikusiko dugu elkar!

Aurkezpenaren ondoren, argitalpena gure webgunean igoko dugu denok eskuragarri izan dezazuen.

‘Finantza etikoen koloreak’ argazki erakusketa Errekaldera (Bilbo) iritsiko da

Urtarrilaren 31tik otsailaren 14ra, ‘Finantza etikoen koloreak’ argazki erakusketaz gozatu dezakezu Errekaldeko udal zentroan (Altube zeharbidea 6, Bilbo). Aitor Lopez de Audikanaren argazkiei esker, El Salvador, Nikaragua eta Euskal Herriko finantza etiko eta alternatiboen ekimenak ezagutzeko aukera izango duzu bertan.

Zure sinadura behar dugu! Gutun irekia, ekonomia-hezkuntza kritiko, plural eta etikoaren alde

Balore Merkatuaren Espainiako Batzordeak (CNMV), Espainiako Bankuak eta Ekonomia Gaietarako eta Eraldaketa Digitalerako Ministerioak eskatu dute finantza-hezkuntzako edukiak zabaltzeko eskola-curriculumean. Eta eskaera horren aurrean, erakunde sinatzaileok eskatzen dugu ekonomia-hezkuntza kritikoago, pluralago eta etikoago baten parte izan dadila finantza-hezkuntza hori.

“Zure sinadura behar dugu! Gutun irekia, ekonomia-hezkuntza kritiko, plural eta etikoaren alde” irakurtzen jarraitu

Podcastaren 4. atala | “Ekonomia eta finantzak ez dira zientzia zehatza” (Batxilergoko Ekonomia eskuliburuaren kritika)

'COOKIES'-en politika onartu behar duzu eduki hau erakusteko.

Institutuan zeundenean ekonomia ikasi al zenuen? Askok ezezko erantzuna emango genuke galdera hori egingo baligute, baina gaur egun gero eta presentzia handiagoa du hezkuntza ekonomiko eta finantzarioak.

Berri ona dirudi, ezta? Azken finean, gustatu ala ez, diruak mundua mugitzen du eta oinarrizko prestakuntza bat izatea oso erabilgarria izan daiteke.

Tamalez, gehienetan, ekonomia zientzia zehatza dela irakasten digute. Hau da, sistema ekonomikoa ulertzeko eta antolatzeko modu bakarra dagoela. “Eta ez al da hala?” Pentsatuko duzue, ziurrenik.

Ba ez. Sistema kapitalistatik at badago bizitza! Hamaika ekimen, erakunde eta pertsona daude ekonomia sozial eta solidarioa bultzatzen dutenak. Baina nerabea zinenean ekonomia irakasgaia izan bazenuen, ziurrenik ez zizuten horren inguruan hitz egin.

Hori dela eta, Batxilergoko ekonomia eskuliburuetako bat analizatu du Finantzaz Haratagok. Maitane Jaio, Javier Murillo eta Jon Bernat Zubiri ekonomian adituak izan dira ikerketaren egileak. Ikasle askorentzat Batxilergoko irakasgai hori izango da ekonomiaren, enpresaren eta finantzen ikasketekin izango duten harreman bakarra beren ibilbide akademiko osoan. Horregatik da horren garrantzitsua ikasgaiaren materialak sakon ikertzea.

Horretaz eta askoz gehiagoz solastu gara Finantzaz Haratagoren podcastaren azken atalean:

'COOKIES'-en politika onartu behar duzu eduki hau erakusteko.

Podcastaren 3. atala | “Ekonomia Sozial eta Solidarioaren Curriculum Global baten aldeko Kanpaina”

'COOKIES'-en politika onartu behar duzu eduki hau erakusteko.

Gure podcastaren aurreko bi ataletan, finantza etikoekin lotutako Euskadiko eta Estatuko sare batez, Finantzaz Haratagoz eta RedEFESez, hitz egin dugu. Kapitulu berri honetan, nazioarteko eta diziplina anitzeko esperientzia bati buruz hitz egingo dugu: Ekonomia Sozial eta Solidarioaren Curriculum Global baten aldeko Kanpaina eta kanpainaz geroztik egiten ari diren Biziera Onaren Unibertsitatea.

Curriculum Global baten aldeko Kanpaina hezkuntza-ekimen bat da, eta 2016ko urrian hasi zuten gizarte-ekonomiako eta ekonomia solidarioko hezkuntza-kolektiboek Hegoalde globalean. Gaur egun, 23 herrialdek, nazioarteko 6 sarek eta 61 erakundek osatzen dute, gizarte-erakundeen, gizarte-mugimenduen, erakundeen, unibertsitateen eta herritartasun globalerako eta bakerako hezkuntzan diharduten eskolen artean.

Atal honetan, honako hauen partaidetza entzun ahal izango duzu:

Gozatu ezazu!

'COOKIES'-en politika onartu behar duzu eduki hau erakusteko.